Şêniyên Wargeha Penaberan a Şehîd Rustem Cûdî (Mexmûr) têkildarî êrîşên li ser Rojava, bitaybet êrîşên li ser Bendava Tişrîn û Pira Qereqozaxê ji ANF’ê re axivîn û nerazîbûna xwe ya li hemberî êrîşan, anîn ziman.

Dayîka bi navê Helîm Îşlek di destpêka axaftinên xwe de hemû şehîdên Rojava bi bîr anî û got: “Me li ser her bostek axa Kobanê xwîna şehîdan daye. Ev çend sal in Kobanê hatiye rizgarkirin, gelê Rojava tama azadiyê girtiye. Dewlet wisa dizane ku wê bi çekê gelê Kurd xilas bike, lê bila baş bizanibe em bi çekê xilas nabin. Em ê bi berxwedanê bigihijin nasname û dîroka xwe. Gelê Kurd bi îradeya xwe ve girêdayî ye, kes nikare îradeya gelê Kurd têk bibe. Dewleta Tirk niha behsa çareseriyê dike, baweriya min bi çareseriya wan nayê. Eger di çareseriyê de cidîne, bila Rêberê me ji zindanê derxînin û deriyê hemû zindanan vekin. Ev hezar sal in em li ser Kurdistanê şer dikin, me berê xwe nas nedikir, me ne dizanî Kurdistan çiye, lê piştî Rêbertî derket û şûn de me nû Kurdistan nas kir. Berê deweleta Tirk gundên me dişewitandin, lê niha îrade û nasnameyek me heye, dewleta Tirk ti carî nikare Kurdan tine bike. Banga min ji bo hemû jinên Kurd ew e ku ji bo Rojava rabin ser xwe.”

‘AŞTÎ BI ÊRÎŞAN NABE’

Mamoste Beşîr Gabarî jî têkildarî heman mijarê axivî û diyar kir ku ev destguhertina desthilatdariyê ya ku li Suriye çêbûyî, dewleta Tirkiye ji bo xwe wekî hêviyekê didît û wiha got: “Hevdîtinên destpêkê yên ku bi Tehrîr El- Şam re hatî kirin, wekî serkeftina xwe didît. Dixwest li Şamê Tehrîr El-Şam li dijî Rojava, QSD û gelê Kurd bide şerkirin, lê nekarî. Dîsa li wan çeteyên ku bi navê Artêşa Milî ya Suriye avakirine vegeriyan û DAÎŞ jî zindî kirin. Destpêkê cihên jiyanî yên ku xelkê debara xwe pêdikin kirin hedef. Yek ji cihên ku niha herî zêde şer li ser tê kirin, Bendava Tişrînê û Pira Qereqozaxê ye. Dewleta Tirk bêyî ku metirsiya bendavê bigire ber çavan, her derê dike hedef. Bi taybet destanên dîrokî li derdora Bendava Tişrîn û Kobanê li dijî êrîşên dagirkeriyê tên nivîsîn, di rastiyê de mirovahî ji êrîşên dagirkeriyê tê parastin. Armanca dewleta Tirk destkeftiyên gelê Kurd e. Niha metirsiyek mezin li ser Rojava heye, eger Rojava têk biçe wê Bakur û Başûr jî têk biçe. Dewleta Tirk li aliyekê êrîşan dike û li aliyê din jî behsa aştiyê dike, aştî bi êrîşan nabe. Em bang li gelê xwe dikin ku Tişrîn û Rojava bi tenê nehêlin.”

‘DIVÊ HER KES BERÊ XWE BIDE ROJAVA Û XWEDÎ LÊ DERKEVE’

Endama Jineolojî Songul Guler jî destpêkê berxwedana gelê Rojava silav kir û ev tişt bilêv kir: “Wek tê zanîn di 27’ê Mijdarê de li Suriye rejîma 56 salan ji aliyê HTŞ û SMO ve hat rûxandin. Ji wê rojê heta îro, wan mezhebek weke yê Elewiyan dane ber xwe û komkujiyan pêk tînin. Eger îro dinya bêdeng e, ev jî dide diyarkirin ku ev çete bi serê xwe van komkujiyan nakin. Di vir de em dibînin hedef ne tenê rejîma Baas bû, hedef pergala netewa demokratîk a ku li Rojava hatî avakirin e. Bi taybet dixwazin bi destê dewleta Tirk, şoreşa ku bi pêşengtiya jinê li Rojavayê Kurdistanê hatî pêşxsitin bifetisînin. Ev jî dide xuyakirin dewleta Tirk şoreşa ku di pêşengtiya jinê de li Rojava hatî avakirin hezm nake. Ji bo vê şoreşê tine bike jî, serî li hemû rê û rêbazên bê exlaqî dide. Ev demeke wek herêm girtine dest, Tişrîn tê hedefgiritin, helbet herêmên wisa hem ji bo Rojava û hem jî ji bo Tirkiyê stratejîk in. Ji ber wê bi rojane dewleta Tirk bi hemû derfetên xwe êrîşî Tişrînê dike. Gelên li Rojava wek Ereb, Suryan û hwd li Tişrînê bûne mertalên zindî û nobet digirin, ev berxwedaniyekî herî mezin e. Em ji hemû gelan re dibêjin ev şansê dawiyê ye, pêwîste hemû gelên bindest li kûderê dibe bila bibe divê li dora pergala netewa demokratîk kom bibin. Ji bo wê jî em bang li hemû jin, ciwan û gelên bindest dikin ku her kes berê xwe bidin Rojava û li vê pergalê xwedî derbikevin.”