Abbas li civîna Konseya Navendî ya Rêxistina Rizgariya Fîlîstînê axivî û got, "Dibêjim ku êdî Oslo nîne."

Civîn ji bo destnîşankirina planeke çalakiyan a li dijî biryara Serokê DYA Donald Trûmp a naskirina Qudsê weke paytexta Îsraîlê, pêk hat.

Mahmûd Abbas di vê civînê de destnîşan kir ku Îsraîlê dawî li Osloyê aniye û diyar kir, divê ji bo paşerojê biryar bên girtin.

Di encama danûstandinên veşartî yên şeş mehan de li Osloyê roja 13'ê Îlona 1993'an, Îsraîlê û Rêxistina Rizgariya Fîlîstînê hevdu nas kiribûn.

Ev peymana li ser pêvajoya derbasbûnê ya pênc salan a der barê otonomiya Fîlîstînê, li Washîngtonê hatibû îmzekirin.

TRÛMP SÎLEYA SEDSALÊ AVÊT

Abbas bal kişand ser plana aştiyê ya Serokê DYA Trûmp û ji bo vê pêşniyarê got, "Sîleya sedsalê ye."

Abbas bi berdewamî got, "Em dibêjin ku em vê plana Trûmp qebûl nakin. Doza sedsalê veguherî sîleya sedsalê."

Abbas piştî biryara Trûmp a li ser Qudsê dabû xuyakirin ku DYA di hevdîtinên aştiyê de nema dikare bibe navbeynkar.