Wezîrên Karên Derve yên Yekitiya Ewrûpayê, li gel nêrînên cûda ambargoya çekan a li ser çekdarên Sûriyê rakir. Lê tê gotin ku beriya civîna Cenevreyê ti welat, wê çekan neşînin.

Şerê bi xwîn ê li Sûriyê ku di Adara sala 2011'an de destpê kir ev 2 sal in dewam dikin û ambargoya çekan a beriya du salan hatibû danîn, ji aliyê Yekitiya Ewrûpayê ve hat rakirin. Wezîrê Karên Derve yê Îngilîstanê Wîllîam Hague, piştî civîna li Brukselê daxuyaniye da û got, "Yekitiya Ewrûpayê biryar da, ambargoya çekan a li ser mûxalefeta Sûriyê rake û li dijî rejîma Sûriyê pêkanînên xwe dewam bike."

Ev biryar, di dema amadekariyên civîna 2. a Cenevre ya bi pêşengiya Washington û Moskowayê de hat girtin. Di êvara 27'ê Gulanê ya ev biryar hat stendin de, Wezîrê Karên Derve yê DYE John Kerry û Wezîrê Karên Derve yê Rûsyayê Sergey Lavrov, li Parîsê hatin cem hev û li ser konferansê hevdîtin kirin.