Tevlîbûna çalakiya greva birçîbûnê ya li Qamişlo zêde dibe
Tevlîbûna çalakiya greva birçîbûnê ya li Qamişlo her diçe zêde dibe. Îro jî 75 kesên din tevlî çalakiyê bûn.
Tevlîbûna çalakiya greva birçîbûnê ya li Qamişlo her diçe zêde dibe. Îro jî 75 kesên din tevlî çalakiyê bûn.
Kongreya Star û PYD`ê li bajarê Qamişlo bi armanca piştgiriya Leyla Guven, bi dirûşmeya "Bi hev re em ê faşîzmê hilweşînin û bi Rêber Ocalan re azad bijîn" duh li pêşiya Stada 12’ê Adarê dest bi çalakiya greva birçîbûnê kiribûn. Di roja yekemîn a çalakiyê de 70 jin û mêr tevlî çalakiyê bûn û roja duyemîn de jî 75 kesên nû tevlî grevê bûn.
‘KURD LI DORÎ RÊBERTIYA XWE BÛNE YEK’
Li konê çalakiyê endamê Komîteya Amadekar Ezedîn Gedo axivî û diyar kir ku rêxistinên mafên mirovan ên navdewletî der di barê tecrîdkirina giran a li ser Rêberê Gelê Kurd Abdullah Ocalan de bê deng in û got: "Em piştgiriyê didin hevrêyên xwe yên di girtîgehên dewleta Tirk a dagirker de ku ji bo azadiya Rêberê Gelê Kurd Abdullah Ocalan dest bi greva birçîbûnê kirine."
Gedo got: “Kurd li dorî Rêbertiya xwe bûne yek.”
Hevserokê Komîna Meclîsa Malbatên Şehîdan Îsam Îbrahîm têkoşîna hevseroka KCD`ê û parlamentera HDP`ê li Colemergê Leyla Guven silav kir û got: "Rêberê Gelê Kurd Abdullah Ocalan ji 20 salan ve di girtîgeha dewleta Tirk a dagirker de ye. Lê wî girtîgeha xwe kiriye dibistana fikr û nêrînên azad."
Tê payîn ku çalakiya greva birçîbûnê bi daxuyaniyeke ya Kongreya Star û PYD’ê bi dawî bibe.