Biryara rêveberiya xweser di civîna Meclîsa Sûriyeya Demokratîk (MSD) ya di 16’ê Tîrmehê de hatibû stendin.

MSD’ê vê pêncşemê li Eyn Îsayê civînek li dar xist û biryara rêveberiya xweser xist meriyetê.

Di civînê meclîs hate avakirin û Sîham Qiryo û Ferît Ette ji bo Hevserokatiya Meclîsa Giştî ya Rêveberiya Xweser a Bakur û Rojhilatê Sûriyeyê hatin hilbijartin.

Hevseroka MSD’ê Emîne Umer, meclîsên sivîl ên Bakurê Sûriyeyê û pêşengên eşîran tevlî civînê bûn.

Hevseroka MSD’ê Emîne Umer di civînê de axivî û got ku, "MSD’ê di konferansa xwe ya sêyemîn de pêşniyaz kiribû ku bila Rêveberiya Xweser a Bakur û Rojhilatê Sûriyeyê were avakirin. Armanca projeyê ev e ku, di navbera rêveberiyên xweser de ji bo koordîneyê pergaleke rêveberiyê were avakirin, valahiya rêveberî û ewlekariyê were tijekirin û Rojhilatê Sûriyeyê li gorî pergala rêveberiyê tevbigere ya ku berê li Bakurê Sûriyeyê hatibû avakirin."

Umer got ku, "Ev rêveberî li herêmê îstîkrar ava kirine û di warê xizmetê de pêdivî bi cih anîne û karibûne herêmê li hemberî êrîşên terorîstan biparêzin. Ligel ku herêm ji hev dûr bûne jî, alîkarî dane hev û li hemberî terorê bi hev re li ber xwe dane."

Umer diyar kir ku di warê avakirina van rêveberiyan de ji ber şertan hin qelsî pêk hatine û qelsiyên di warê xizmetêde bandoreke neyînî li gel kiriye. Umer bal kişand ser vî tiştî ku ji bo qelsî bên kêmkirin û di navbera herêman de hevsengek were avakirin pêdivî bi pergalekê heye ku karibe di navbera rêveberiyên herêman de koordîneyê bike.

Umer diyar kir ku piştî nîqaşên bi rêveberiyên xweser û meclîsên sivîl, biryar dane ku rêveberiya hevpar a Sûriyeya Bakur û Rojhilat ava bikin.

Umer diyar kir ku wan tevî rêveberiyên xweser, meclîsên sivîl û meclîsên zagonsaz ji bo meclîsa giştî lîsteyek ava kirine ya ku ji 70 kesan pêk tê û got, "Li ser vî esasî em MSD diyar dikin ku ev civîn, civîna pêşî ya Meclîsa Giştî ya Rêveberiya Xweser a Demokratîk a Bakur û Rojhilatê Sûriyeyê ye."