Hêzên Sûriya Demokratîk (QSD) li ser malpera xwe ya fermî daxuyaniyek da û da zanîn ku li navçeya El Kesra ya Dêrazorê di encama operasyoneke hêzên wan û Koalîsyona Navneteweyî de serçeteyekî DAÎŞ’ê hatiye girtin.

QSD’ê di daxuyaniyê de diyar kir ku operasyonên hêzên wan û Koalîsyona Navneteweyî yên hevpar li dijî DAÎŞ’ê dewam dikin û di 2 hefteyên borî de 5 operasyon li dar xistine.

QSD’ê ev agahî dan: “Roja îna borî 16’ê Kanûnê, hêzên me bi piştevaniya hêzên Koalîsyona Navneteweyî li navçeya El Kesra ya li rojavayê Dêrazorê operasyonek pêk anî û di encamê de emîrekî xwecih ê rêxistina terorîst a DAÎŞ’ê hat girtin. Ew berpirsê organîzekirin û xebata şaneyên terorîst ên li herêmê ye.”

Her wiha QSD’ê da zanîn ku di operasyonê de tevî alavên pêwendiyan, gelek belge jî hatine desteserkirin.