Di çalakiyê de alayên YPG/YPJ, PYD’ê û wêneyê Rêberê Gelê Kurd Abdullah Ocalan hate hildan. Di daxuyaniya hevpar a NCDK’a Stockholmê û Meclîsa Jinên Kurd a Amarayê de hate diyarkirin ku ew ê gelê Kurd destûrê nedin vî tiştî ku dewleta Tirk û çeteyên wê êrîşî Efrînê bikin.

Bang hate kirin ku, divê raya giştî ya cîhanê bi giyan û biryardariya Berxwedana Kobanê li Efrînê xwedî derkeve. Di heman demê de bang li Hikumeta Swêdê û Yekîtiya Ewrûpayê hate kirin ku bila li dijî dewleta Tirk a ku bi çeteyan re hevkariyê dike, helwesta xwe eşkere bikin.

Di çalakiyê de sloganên ‘Dewleta Tirk ji Kurdistanê biteqize’, ‘Erdoganê qatîl û faşîst’, ‘Bijî Berxwedana Efrînê’ hatin berzkirin.

Piştre gel bi sloganan heta Qada Seregelê ya li navenda bajêr meşiyan û hatin heta Drottnîngatanê ya ku ji rêveçûna peyayan re girtiye.

Li ser navê Komîteyên Rojava Tomas Pettersson axivî û diyar kir ku Erdogan ji bo rakirina projeya konfederalîzma demokratîk a ku gelê Kurd ava kiriye, li dijî Efrînê amadekariyan dike û got, “Divê dewleta Tirk bi vî tiştî zanibe ku, gelê Efrînê ne bi tenê ye. Em ê destûrê nedin dagirkirina Efrînê. Heke dewleta Tirk êrîşî Efrînê bike ew ê Efrîn bibe Kobanêya duyemîn. Em bang li welatên cîhanê dikin ku bila çekan nefiroşin rejîma Tirkiyeyê û bila piştgiriya Efrîn û gelê Kurd bikin.”