Tevgera Ciwanên Şoreşger ên Sûriyê li bajarê Minbicê li dijî tecrîda li ser Rêberê Gelê Kurd Abdullah Ocalan meşek li dar xistin. Tevî endamên tevgerê, endamên Rêveberiya Sivîl a Demokratîk a Minbicê, nûnerên partiyên siyasî, rûspiyên eşîran, saziyên jinan û şêniyên herêmê tev li meşe bûn.

Di meşê de alên Rêberê Gelê Kurd Abdullah Ocalan, Tevgera Ciwanan û Yekitiya Jinên Ciwan û PKK`ê hildan û ji Çerxerêya Mîzan heta Yarîgeha Beledî meşiyan. Li yarîgehê endamê tevgerê Nasir Hesen axivî û berxwedana gerîla ya li Herêmên Parastinê yên Medyayê silav kir.

Hesen îşaret bi berxwedana gelê Bakur û Rojhilatê Sûriyê û berxwedana gerîlayên azadiyê kir û diyar kir ku gelê herêmê bi ruh û fikrê felsefeya Rêberê Gelê Kurd Abdullah Ocalan yekdest e, ji lew re dewletên komploger hewl didin projeya li herêmê têk bibin û got: “Ev proje projeya mirovahiyê ya tevahî gelan e.”

Hesen destnîşan kir ku wek ciwan ew ê heta rizgarkirina tevahiya deverên Sûriyê yên dagirkirî û pêkanîna azadiya fîzîkî ya Rêberê Gelê Kurd Abdullah Ocalan têkoşînê bidomînin û xak û gelê xwe biparêzin.