Bi sedan welatiyên bajarê minbicê cenazeyên şervanên Meclîsa Leşkerî ya Minbicê Mutesîm Billah (Ebû Delal), Abdullah Hesen Abdullah, Abdullerhman Eqîlî (Cikliş Şemis Şîmal) û Cemîl Kamil Abddullqadir ku di Pêngava Rizgarkirina Reqayê de şehîd bibûn, ji Nexweşxaneya Firatê wergirtin û bi karwanekî wesayîtan berê xwe dan goristana şehîdan a Minbicê.

Li goristanê merasîmekî leşkerî hate lidarxistin. Fermandarê Giştî yê Meclîsa Leşkerî ya Minbicê Ednan Ebû Emced, Hevserokên Meclîsa Zagonsaz-Rêveberiya Sivîl a Demokratîk Nezîfe Xilo û Farûq Maşî,  Fermandarê Giştî yê Meclîsa Leşkerî yê Babê Cemal Ebû Cuma û saziyên civaka sivîl, beşdarî merasîmê bûn.‫

Di  merasîmê de, Hevserokê Meclîsa Malbatên Şehîdan Îbrahîm El-Xelîf axivî û  sersaxî ji malbatên şehîdan re xwestin û got ku  şehîdan di oxira parastina gel û  axa xwe de, destanên dîrokî nivîsandin.

Ji Fermandarên Meclîsa Leşkerî ya Minbicê  Îbrahîm El-Benawî axivî û soza şopandina rêya  şehîdan ta rizgarkirina hemû herêmê ji çete û teroran da. Îbrahîm bang li hemû gelên herêmê kir ku yekrêziya xwe xurt bikin û destkeftiyên ku bi saya  xwîna şehîdan li Bakûrê Sûriyê hatine bidestxistin, biparêzin.

Her wiha  Farûq Maşî jî axivî û got ku ji bo pêkanîna armancên şehîdan, ew ê heta dawiyê têkoşîn û xebatê, dewam bikin.

Piştî axaftin bidawî bûn, Endama Saziya  Malbatên Şehîdan Fatima El-Diba nasnameya   her çar şehîdan xwend û radestî malbatên wan kir.

Piştre cenazeyê 4 şervanên Meclîsa Leşkerî ya Minbicê bi dirûşmeyên 'Şehîd Namirin' li goristanê hatin veşartin.