Bi sedan welatiyên kantona Kobanê cenazeyê endamên asayîşê Wês Romî (Wês), Celal Şêx Elî (Celal) dema li ser erka xwe bûn şehîd bûbûn û şervanê YPG`ê Baqir Neisan (Bakur) ê ku di ‘Şerê Tinekirina Terorê’de şehîd bûbûn, bi merasîmekê li Goristana Şehîd Dîcle veşartin.

Li goristanê ji bo bîranîna şehîdan deqîqeyek rêz hate girtin û ji aliyê endamên asayîşê ve merasîmeke leşkerî hate lidarxistin. Piştre li ser navê Hêzên Ewlehiya Navxweyî a Kobanê Îsmaîl Xelîl axivî, sersaxî ji malbata şehîdan re xwest û got:"Em bi saya xwîna van şehîdan û hemû şehîdên Tevgera Azadiyê yên ku canê xwe ji bo me feda kirin gihîştin vê astê û me gelek destkeftî bi dest xistin. Şehîdên me ji bo ku gelê me bi aramî bijîn xwe kirin mertalên zindî.”

Endama PYD`ê Eyşe Efendî jî axivî, sersaxî ji malbatên şehîdan re xwest û soza dewamkirina têkoşînê nû kir.

Piştre li ser navê malbatan Xelîl Mislim axivî û got; “Em Îro dîsa 3`ê lehengên xwe dispêrin axê û em bi wan serbilind in.”

Piştre nasnameyên şehadetê yên şehîdan hatin xwendin û radestî malbatên wan hatin kirin. Girseya gel bi dirûşme û tilîliyan cenazeyê hersê şehîdan li goristanê veşartin.