Îro Meclisa Malbatên Şehîdan a Hesekê 137 şehîdên meha Adarê ku di salên cuda de şehîd bûne, li Hola Reşo ya bajêr bi bîr anîn. Bi sedan şêniyên Hesekê, malbatên şehîdan û endamên meclisê tev li merasîma bîranînê bûn.

Malbatên şehîdan 83 şervanên YPJ, YPG, Hêzên Ewlekariya Hundirîn, Hêzên Parastina Gel (HPG) û 54 şehîdên sivîl ku êvara cejna Newrozê ya 2015`an şehîd bûbûn, bi bîr anîn.

Di destpêka bîranînê de endama Meclisa Malbatên Şehîdan Ezîza Hisên got: "Em îro şehîdên ku ji bo me tê koşiyan û parastina me kirin, bi bîr tînin. Em ê şopdarên rêya şehîdan bin, da ku armancên wan pêk bînin û parastina destkeftiyên Şoreşa 19`ê Tîrmehê bikin.”

Piştre endamê Meclisa Leşkerî ya Hesekê Alan Hesekê axivî û got: "Şehîdan di oxira parastina herêmên xwe de, şer kir û lewma ger ne ji fedakariya wan bûya, dê herêm têk biçûya."

Alan Hesekê soza şopandina rêya şehîdan heta mîsogeriya ewlehiya welêt da.

Di dawiya merasîma bibîranînê de, sînevîzyonek hat pêşandan.