Gaziyên Jin ên Federasyona Gaziyên Bakur û Rojhilatê Sûriyeyê têkildarî êrîşên dewleta Tirk ên li ser gelên Bakur û Rojhilatê Sûriyeyê daxuyanî da.

Daxuyanî bi vî rengî ye:

“Dewleta Tirk a dagirker û çeteyên wê bi ketina rejîma rejîma Esed re ji 8’ê Kanûna 2024’an ve li hemberî herêmên me yên rêveberiya xweser a bi xwîna bi hezaran şehîdan ava bûye, êrîşên xwe yên herî hovane dijwartir kiriye. Dewleta faşîst a di wan êrîşan de encam negirt, dest bi komkujiyên li hemberî gelên me yên azadîxwaz ên li Bakur û Rojhilatê Sûriyeyê kiriye.

Di şexsê pêşenga jinên endama Meclîsa Giştî ya PYD’ê û Hevseroka Nivîsgeha PYD’ê ya Qamişlo Menîce Haco û hunermendê dildarê Rêbertî û gelê xwe Cûma Xelîl (Bavê Teyar) de em tevahî şehîdên xwe yên di êrîşên dewleta Tirk a faşîst de şehîd bûne bi rêzdarî bi bîr tînin.

Pêwîst e dewleta Tirk a dagirker a xwedî hişmendiyeke herî hov, zanibe ku ew û hevalbendên xwe çi bikin bila bikin wê vîna gelan bi ser bikeve. Weke tê dîtin berxwedana gelê Kurd û gelên li Bakur û Rojhilatê Sûriyeyê îspat dike ku dema gel xwe bi rêxistin bikin û bibin yek ti hêz nikare wan bişikîne û teslîm bigire. Gotinek zanyaran a bi awayê, ‘Eger rojekê gelek bixwaze jiyanek azad bijî, teqez wê qeder jî bersivê bide û daxwaza wan pêk bîne’ heye. Gelên azadîxwaz ên Bakur û Rojhilatê Sûriyeyê îro biryar dane jiyaneke azad û wekhev a pêkve bi hemû xweşikiya xwe bijîn. Teqez wê qeder jî bersivê bide û rêya wan rohnî bike. Bi rastî vîna gelan bingehê serketinê ye. Gelên herêmê di pêşengtiya gelê Kurd de biryara xwe dane û bi serbilindî têkoşîn dikin. Weke em tev dişopînin û dibînin gelên me bi rojane di nava çalakiyên herî mirovî de ne. Helwesta xwe pir zelal danîne holê û destketiyên xwe diparêzin.

Weke gaziyên jin em berxwedana gelên me ya li Bendava Tişrînê bi serbilindî silav dikin. Ji wê berxwedanê em hêz, coş û vîneke bêhempa digirin. Gelên me yên dilsozên azadiyê çalakiyên xwe berdewam dikin û meydanê li dewleta Tirk û çeteyên wê dixwin. Em heyrana vîna gelên xwe ne, em wan ji dil û can hembêz dikin û dibêjin, ‘Bijî û her bijî ji têkoşîn û berxwedana we re!’ Gelên me yên berxwedêr piştrast kirin ku gelên Rêber Apo ne, li ser xet û şopa Rêbertî dimeşin.

Rêber Apo li girava Îmraliyê, şêrejin û egîdên me li qadên şer û gelên me jî li tevahiya Bakur û Rojhilatê Sûriyeyê di nav berxwedanê de ne. Divê em zanibin ku dijmin bi her awayî zeîf û lawaz bûye. Bi xurtkirina têkoşîn û berxwedanê wê bi temamî hilweşe. Ji sedî sed wê serketin a berxwedêran be.

Li ser van esasan di serî jinên ciwan em bang li tevahî jin û ciwanan dikin, di vê berxwedana rûmetê de cihê xwe bigirin. Her wiha em bang li tevahî welatparêzan dikin ku li hember şerê taybet ê dewleta Tirk a dagirker hişyar bin. Dewleta faşîst û çeteyên wê yên di meydanên şer de rastî şikestinên mezin tên bi rêya ragihandin-çapemenî û bi taybet bi rêya medya dîjîtal hewl didin rastiyên li qadên şer berevajî bikin. Bi vî rengî dixwazin moral û coşa gelên me xerab bikin. Lewma ji bilî ragihandin û çapemeniya me ya azad divê em qet guh nedin ragihandina dewleta Tirk a dagirker û çeteyên wê.

Di dawiyê de jî em careke din pêşeng û hevrêyên xwe yên di êrîşên li ser bendava Tişrînê şehîd bûne bi rêz û hurmet bi bîr tînin. Em ji malbatên me yên şehîdan re sersaxiyê dixwazin û ji birîndaran re jî şifaya xêrê dixwazin.”