Serokeşîrên Herêma Firatê ji bo gotûbêjkirina dagirkeriya dewleta Tirk û gefên dagirkeriyê, li Navenda Çand û Hunerê ya Sirînê li hev civiyan.

Ji fermandarên QSD’ê Hisên Koçer di axavtina destpêkê ya civînê de destnîşan kir ku di pêvajoya şer de gel divê bibe yek û xwe li ser esasê parastinê bi rêxistin bike.

Koçer got: “Em xwe bi xwe bi rê ve dibin. Em serî li ber desthilatdariyên ku dixwazin herêmê dagir bikin natewînin û li hemberî her cure êrîşê bêdeng nemînin.’’

Koçer îşaret bi tecrîda li ser Rêberê Gelê Kurd Abdullah Ocalan jî kir û wiha axivî: “Çima li ser Rêber Abdullah Ocalan tecrîdê ferz dikin û mafên wî yên rewa asteng dikin? Rêber Apo bi fikirên xwe gelê herêmê bi pêş de bir û pergalên serdest ji vê ditirsin. Dema rabûna li hember pergala faşîst hatiye.’’

Koçer behsa hewildana dorpêçkirina herêmê ya ji gelek aliyan ve jî kir û wiha pêde çû: “Hikûmeta Şamê jî li dijî vîna gelê herêmê derket, li ser desthilatdariyê israr kir û bû sedema xerabûna Sûriyeyê. Di vê çarçoveyê de divê her kes xwe ji bo parastina çanda herêmê amade bike.’’

Hisên Koçer axavtina xwe wiha bi dawî kir: “Niha em xwe ji bo azadkirina herêmên xwe yên Erdogan dagir kirine re amade dikin.’’