Li Kantona Kobanê bi armanca şermezarkirina tecrîda girankirî ya li ser Rêberê Gelê Kurd Abdullah Ocalan, çalakiya konvedanê hat destpêkirin. Çalakiya ku li Qada Şehîd Egîd bi pêşengiya Ciwanên Şoreşger û Yekîtiya Jinên Ciwan hatî destpêkirin, gelek saziyên civakî û endamên Rêveberiya Xweser piştgirî dan.

Di çalakiya konvedanê ya ku bi deqeyek rêzgirtinê destpêkir de, Rêveberiya Ciwanên Şoreşger ya Herêma Firatê Hebûn Mihemed axivî. Mihemed destnîşan kir ku ew ê çalakiyên xwe li dijî tecrîdê, heta azadiya fîzîkî yê Rêberê Gelê Kurd Abdullah Ocalan pêk tê dê dewam bikin. Mihemed got, “Ew ê berxwedana me û têkoşîna me berdewam bikin. Wek ciwanên pêşeng çi ji destê me bê em ê bikin.”

Endamê Desteya Meclîsa Rêveber Ehmed Xoce jî diyar kir ku Rêberê Gelê Kurd Abdullah Ocalan ji bo azadî û nasnamebûna gelê Kurd têkoşînek bê hempa daye meşandin û wiha got, “Fikir û felsefeyek danî holê. Li ser bingeha vê felsefeyê, îro bi milyonan Kurdistanî li her aliyê cîhanê têdikoşe. Em ê di encama têkoşîn û berxwedana xwe de azad bibin. Ji bo azadiya Rêber Apo em ê her di nava têkoşînê de bin.”

Çalakiya konvedanê du roj wê bi beşdariya şêniyên tevahiya navçeyên kantonê berdewam bike.