Bi sedan welatiyên bajarê Hesekê cenazeyê şervanên YPG’ê Rênas Ehmed (Ceger Hesekê) û Xelîl Dawûd (Şoreş Hesekê) ku di Pêngava Bagera Cizîrê de şehîd bûbûn, ji Meclîsa Malbatên Şehîdan wergirtin û ber bi Goristana Şehîd Dijwar ve ketin rê.

Li goristanê ji bo cangoriyên azadiyê deqîqeyekê rêz hate girtin û piştre merasîmeke leşkerî hate lidarxistin. Piştre Endama Meclîsa Malbatên Şehîdan a bajarê Hesekê Nesrîn Mirî axivî, sersaxî ji malbatên cangoriyan re xwest û bal kişand ser piştgiriya gelê Hesekê ya ji bo gelê Efrînê.

Fermandarê YPG′ê Kawa Hesekê jî axivî û got “Wê QSD ji bo azadî û rûmeta gelê xwe berxwedan  û têkoşîna xwe bidomîne. Bila dewleta Tirk baş bizanibe  em destûr nadin ku  bihustek ji axa Efrînê dagir bike.”

Her wiha Endamê PYD′ê Şaha Sîno jî da zanîn ku gelên Bakurê Sûriyeyê ji bo azadiya gelên Rojhilata Navîn bedelên giran didin.

Di dawiyê de, nasnameyên herdU têkoşeran hatin xwendin, radestî malbatên wan hatin kirin û cenazeyên wan li goristanê bi tilîliyên dayîkan û dirûşmeya ‘Şehîd Namirin’ hatin veşartin.