Cenazeyê şervanê YPG'ê Îbrahîm Ehmed (Ciwan Serêkaniyê), ku di 13'ê Hezîranê de di Pêngava Rizgarkirina Reqayê de şehîd bû, ji Nexweşxaneya Roj a li Serêkaniyê hate rakirin û birin Şehîdgeha Şehîd Rustem.

Piştî merasîma leşkerî ya li şehîdgehê, Elî Xelîl li ser navê Meclîsa Malbatên Şehîdan a Serêkaniyê axivî û diyar kir, gelên herêmê wê bi rengekî hevpar li dijî plan û êrîşên dijmin têbikoşin. Xelîl got, "Şehîdên me bi xwîna xwe axa welêt av dan. Em soz didin, ku em ê li ser şopa wan bin."

Ji fermandarên YPG/YPJ'ê Agirî Jiyan jî diyar kir, plan û êrîşên dijmin ên li herêmê roj bi roj zêde dibin û got, şervanên azadiyê li Reqayê her roj mohra xwe datînin binê serketinên mezin.

Piştî axaftinê, belgeya şehadetê ya şehîd hate xwendin û radestî malbatê hate kirin. Di dawiya merasîmê de cenazeyê Şehîd Ciwan li ber qîrîna dirûşman hate veşartin.