Bi sedan şêniyên Kantona Qamişlo cenazeyê şervanê YPG’ê Wesam El-Xanim (Serxebûn Qamişlo) ji Mala Gel a taxa El-Enteriyê wergirtin û bi karwaneke wesayîtan berê xwe dan Goristana Şehîd Delîl Saroxan a bajarê Qamişlo.

Li goristanê, merasîm bi deqeyek rêzgirtina şervanan ve destpê kir. Piştîre jî bavê şehîd Serxebûn Qamişlo, Elî Ebd El-Xanim axivî û got: “Min kurê xwe fedayî vî welatî ku cudahî naxê di navbera gelê Kurd, Ereb û Suryan de, kir. Em hemû amade ne ku di rêya şehîdan de bimeşin û xwîna xwe ji bo vî welatî bidin.”

Li ser navê Meclîsa Malbatên Şehîdan, Hêvî El-Seyd jî axivî û bi xêrhatina beşdaran kir û sersaxî ji malbata têkoşer re xwest.

Cîgirê Hevserokatiya Desteya Parastinê, Ayid Îbrahîm jî axivî û destnîşan kir ku wan bi rêya şehîdan pêvajoyên hesas derbas kirine û gelê herêmê bû yek.

Piştî axaftininan, nasnameya şehîd hate xwendin û radestî malbatê, hate kirin.

Di dawiya merasîmê de , li gel dûrişmeyên dilsoziya bi şehîdan re, cenazeyê têkoşer Serxebûn Qamişlo li rex hevreyên xwe hate veşartin.