Cenazeyê şervanê QSD’ê Necmedîn Fenûş (Ronî Hesekê) ê li Dêrazorê şehîd bibû, bi merasîmekî girseyî li Goristana Şehîd Dijwar a li gundê Dawudiyê hat veşartin. Bi sedan şêniyên bajarê Hesekê tev li merasîma cenaze bû. Di merasîmê de gerîlayê HPG’ê Diyar Mêrdîn (Egîd Serdar) ê di 1’ê Tebaxa 2023’an de li Zapê şehîd bibû, hate bibîranîn.

Di merasîmê de endama Meclîsa Malbatên Şehîdan a Hesekê Gulçîn Ehmed axivî û got: "Em di qonaxeke pir girîng re derbas dibin, hemû dewlet ji bo têkbirina projeya me ya demokratîk  û derxistina fitneyan di navbera pêkhateyan de bûne yek. Lê bi saya berxwedana gelê herêmê ev plan têk diçin."

Ehmed bal kişand bi ser êrişên dewleta Tirk a dagirker ên li ser Herêmên Parastinê yên Medyayê û wiha got: "Dewleta Tirk a dagirker bi hemû derfetên xwe û bi çekên qedexekirî êrîşî Herêmên Parastinê yên Medyayê dike da ku hêza gerîla lawaz bikin. Lê dewleta Tirk çi dike û çiqasî êrîşên xwe giran bike jî wê nikaribe gerîla têk bibe û berxwedana wan lawaz bike."

Ji fermandarêm Meclîsa Leşkerî ya Hesekê Alan Hesekê diyar kir ku tevî hemû êrîşên li dijî gerîlayên HPG'ê dîsa jî îradeya gerîlayan kêm nebûye û her diçe xurt dibe. Alan Hesekê got: “Daxwaza me zelal e, ew jî yekitiya xaka Kurdistanê ye. Em ji xiyaneta Partiya Demokrat a Kurdistanê (PDK) re jî dibêjin êdî bes e."

Endama Meclîsa Malbatên Şehîdan Rojda Ehmed wesîqeyên şehîd Ronî Hesekê û Egîd Serdar xwendin û radestî malbatên wan kirin.

Cenazeyê şehîd Ronî Hesekê bi tilîliyên dayikan û dirûmeyên "Şehîd namirin" hat veşartin.