Bi sedan Kurd, Ereb û Suryaniyên navçeya Tirbespiyê berê xwe dan Goristana Şehîd Dilşêr a gundê Dugirê û tevlê meresîma veşartina cenazeyê endamê Hêzên Ewlekariya Hundirîn şehîd Dara Silêman El-Meo bûn.

Di merasîmê de endamê Meclisa Malbatên Şehîdan a navçeya Tirbespiyê Hac Ebdî Xelef axivî û derbirî ku dewleta Tirk a dagirker aştî û aramiya li Bakur û Rojhilatê Sûriyeyê xera bike û herêmê ji welatiyên wê yên esil xalî bike.

Hac Ebdî Xelef îşaret bi wê yekê kir ku pêkhateyên Bakur û Rojhilatê Sûriyeyê ji destpêka şoreşê heta bi niha bi hemû şêweyan şerê terorê dikin, ku gelek dewlet û di serî de Tirkiye piştgiriya wan dikin û bi wê yekê hewil didin aramiya herêmê xera bikin û herêmê dagir bikin, şêniyên wê yên esil bikin koçber û kesên biyanî li şûna wan bi cih bikin.

Ji fermandarên Hêzên Sûriyeya Demokratîk (QSD) Mihemed Zêdan jî axivî û got ku Hêzên Sûriyeya Demokratîk şerê terorê kirin, karîn serkeftinê bi dest bixin û rê li ber pêkanîna komkujiyan li dijî pêkhateyên herêmê bigirin, her wiha karî ewlehî û aramiyê mayînde bikin. Mihemed Zêdan bang li hemû pêkhateyan kir ku li hemberî êrîşên dewleta Tirk a dagirker hişyar bin û li hember van êrîşan rabin.

Piştre nasnameya şehîd Dara El-Meo hate xwendin û radestê malbata wî hate kirin.

Li ser navê malbata şehîd, Casim El-Xelîfe bang li hemû pêkhateyên herêmê kir ku li ser şopa şehîdan bimeşin da ku serketinê bi dest bixin û bi azadî û bi rûmet bijîn.

Di dawiyê de cenazeyê şehîd bi dirûşmeyên dilsoziya bi şehîdan re hat veşartin.