Çalakiya şermezarkirinê di çarçoveya kampanya “Dema Azadiyê ye” hat lidarxistin. Meşa girseyî bi pêşengiya Rêveberiya Sivîl a Demokratîk a herêma Tebqayê û bi tevlêbûna sedan şênî û saziyên sivîl ên bajêr ji pêşiya navenda Kombûna Jinan a Zenûbiya dest pê kir û heta navenda çandê dewam kir.

Beşdarên meşê wêneyên Rêberê Gelê Kurd Abdullah Ocalan hildan û bi dirûşmeyan banga azadiya fîzîkî ya Rêberê Gelê Kurd Abdullah Ocalan kirin, her wiha êrişên dagirkeriyê yên dewleta Tirk a faşîst şermezar kirin.

Li pêşiya navenda çandê, endama rêveberiya Kombûna Jinan a Zenûbiya li Tebqayê Semîre El-Heneş axivî. Semîre El-Heneş diyarkir ku berxwedan berdewam e û heta ku azadiya fîzîkî ya Rêberê Gelê Kurd Abdullah Ocalan pêk neyê û dagirkerî li seranserê herêmên Sûriyê bi dawî nebe, wê gel ranawste.

Semîre bang li civata navneteweyî û bi taybetî rêxistinên mafên mirovan kir ku sînorekî ji dewleta Tirk re deynin û wê neçarî pêkanîna qaûnên navneteweyî bikin.

Hevseroka Meclisa Zagonsaz a Tebqayê Huda El-Elwan li ser navê Rêveberiya Sivîl a Tebqayê wiha axivî: “Dewleta Tirk nikare roja azadiyê ku bi fikrê Rêber Ocalan derketiye, tarî bike. Dewleta Tirk tenê di aliyê fîzîkî de Rêbertî girtiye, lê belê çiqas hewl bide jî wê nikaribe fikrê wî tune bike.”

Endama rêveberiya Meclisa Malbatên Şehîdan a Tebqayê Foza El-Mihemed jî axivî û got: “Me di oxira biratiya gelan û projeya neteweya demokratîk a Rêber Ocalan pêşkêş kiriye de, bi hezaran şehîd dan. Îro em vê fikir û felsefeyê li Bakur û Rojhilatê Sûriyê pêk tînin. Em dev ji xeta şehîdan bernadin.”