YSK’ê encamên demkî yên hilbijartinên 7’ê Hezîranê aşkera kir.

Desteya Hilbijartinê ya Bilind (YSK) encamên hilbijartinên 7’ê Hezîranê yên demkî aşkera kir. Li gorî encamên demkî yên YSK’ê ji 56 mîlyon û 608 hezar û 817 hilbijêran, 47 mîlyon û 507 hezar û 389 welatî çûne ser sindoqan û dengên xwe bikar anîne. 46 mîlyon û 161 hezar û 49 deng hatine qebûlkirin û dengên mîlyonek û 346 hezar û 340 welatiyan hatine betalkirin. Radeya tevlîbûna hilbijartinê jî ji sedî 83.92 hate aşkerakirin.

Li gorî daxuyaniya YSK’ê 45 mîlyon û 119 hezar û 570 hilbijêr li welat, 918 hezar û 311 hilbijêran jî li derveyî welat, 123 hezar û 168 welatiyan jî li deriyên gumrukan dengên xwe bi kar anîne.

Li gorî encamên demkî yên hilbijartinê deriyên gumrukê jî di nav de 18 mîlyon û 863 û 832 hilbijêran dengên xwe dane AKP’ê û AKP ji sedî 40.87’an ve bû partiya yekemîn. Partiya duyemîn jî bi 11 mîlyon û 518 dengên welat, derveyî welat û gumrukan girtiye û ji sedî 24. 95 deng girtiye CHP ye. MHP’ê 7 mîlyon û 519 û 103 deng girtiye û dengê wê ji sedî 16.29 e û bûye partiya sêyemîn.

Li gor YSK’ê radeya dengên HDP’ê jî ji sedî 13.12 e. Li gorî vê yekê HDP’ê 6 mîlyon 58 hezar û 150 deng girtiye.

Tifaqa SP û BBP’ê ya ku bi navê SP’ê ketin hilbijartinê jî ji 949 hezar û 893 hilbêjeran deng girtin û radeya dengê ku girtine jî ji sedî 2.06 e.