Xebatkarê rojnameya Yenî Yaşamê Hamdûllah Bayram, li ber Postaxaneya Ahmetlerê ya navçeya Çankaya ya Enqereyê hate destgîrkirin.

Du kesên nasnameya xwe aşkere nekirin Bayram dan sekinandin, gef lê xwarin û jê re gotin: "Em we û rojnameya we jî dizanin. Em ê we jî, rojnameya we jî û ajansa we jî bişewitînin." Piştî Bayram bertek nîşan da, her du kesan diyar kirin ew polîsin û Bayram destgîr kirin.

Piştî ku Bayram agahî ji malbata xwe re şand, hevalên wî hatin cihê bûyerê. Hevalên wî diyar kirin ku polîsan ji paş ve destên Bayram kelemçe kirine û ew spartine dîwar. Her wiha polîsan gef li hevalên Bayram jî xwarin û ji wan re gotin, wê wan jî destgîr bikin. Bayram, bi wesayîta fermî ya polîsan birin Midûriyeta Emniyetê ya Çankayayê. Her wiha polîsan dest danîn ser telefona Bayram û pereyê wî.

Her wiha nehate zanîn ku Bayram ji ber çi hatiye destgîrkirin.