Hevserokê berê PYD’ê û rayedarê Têkiliyên Derve yê TEV-DEM’ê Salih Muslum duh li Pragê ya ku paytexta Çekyayê ye hatibû binçavkirin.

Polîsên Çekyayê daxuyanî dabûn û diyar kiribûn ku, Muslum li ser daxwaza Tirkiyeyê hatiye binçavkirin.

Parêzerê Muslim Tomas Pelîkan ragihand ku wî duh Muslum dîtiye û rewşa wî baş e. Parêzer Pelîkan ragihand ku polîsan dosyeya têkildarî Muslum negihandine dozgeriyê û ji ber vê jî dîroka dadgehê nehatiye zelalkirin.

Li gorî zagonan polîs divê herî dereng îşev heta saet 23.00’an dosyeyê pêşkêşî dozgeriyê bikin. Heke ev tişt pêk were ew ê Muslim sibê derkeve dadgehê. Heke polîs heta vê saetê dosyeyê pêşkêş neke ew ê dozger têkildarî binçavkirinê biryara xwe bide.

Parêzer Pelîkan ragihand, ji ber ku di sala 2017’an de li hemberî Muslum li Tirkiyeyê dozek hatiye vekirin, Muslum hatiye binçavkirin.

KURD Û DOSTÊN WAN BI HÊRS IN

Li gelek bajarên Ewrûpayê gelek Kurd û dostên wan ji bo ku piştgiriyê bidin Muslum berê xwe didin Pragê û bi faks, e-maîl û telefonan peyamên protestoyê radigihînin Sefaretxane û Konsolosxaneya Çekyayê.

Komîteya ku ji bo şopandina doza Salih Muslum hatibû avakirin, bang li gelê Kurd kir ku bila çalakiyên xwe yên protestoyê bidomînin.