Festîvala 2 rojan a li navçeya Xelfetî ya Rihayê bi boneya 76’emîn rojbûna Rêber Apo bi coş didome.

Endamên Meclisa Ciwanên Partiya Wekhevî û Demokrasiyê ya Gelan (DEM Partî) ku 3 roj in bi dirûşma "Em bi civaka demokratîk ber bi azadiyê ve dimeşin" ji Amedê ber bi Amarayê ve dimeşin, gihîştin qada festîvalê.

Ciwanên ku astengiyên hêzên artêşa Tirk derbas kirin û xwe gihandin navçeyê û heta qada festîvalê dirûşmên “Bijî Serok Apo” û “Rojbûna te pîroz be ey Serok Apo” berz kirin.

Li qada festîvalê ciwan bi kulîlkan hatin pêşwazîkirin.

Di merasîma pêşwazîkirinê de wêneyên Mustafa Dag û Mahsûm Karaoglan ên ku di sala 2009'an de di meşa "Rêwîtiya Rojê" ya ber bi Amarayê ve hatibûn qetilkirin hatin hilgirtin û strana Seyda Perînçek a "Şehîdê Amara" hat xwendin. Gelek caran dirûşma “Şehîd namirin” hat berzkirin.