Qetilkirina Serokê Baroya Amedê Tahîr Elçî, li Erîvanê bi daxuyaniyeke çapemeniyê hat şermezarkirin.

Serokê Yekîtiya Şêwra Kurdên li Ermenîstanê Kinyasê Hemîd û Serokê Saziya Dostaniya Kurd-Ermeniyan parlamenterê Parlamenta Ermenîstanê Aragats Akhoyan, li ofûsa Akhoyan li ser mijarê daxuyaniyeke hevpar dan çapemeniyê.

Akhoyan di destpêka axaftina xwe de ji malbata Serokê Baroya Amedê Tahîr Elçî, heval û hogirên wî û gelê Kurd re sersaxî xwest û da zanîn ku bi qetilkirina Elçî re dewleta Tirk êrîşên xwe yên li hemberî gelan derxistiye asta herî bilind.

Akhoyan da xuyakirin ku Serokê Saziya Dostaniyan Kurd û Ermeniyan ew ji ber qetilkirina Elçî dewleta Tirk bi tundî şermezar dike û anî ziman ku gele Kurd wê xewn û xeyalên Elçî li erdê nehêle û di demeke kurt de bigihêje azadiyê.

Kinyasê Hemîd jî bi şermezarkirina dewleta Tirk dest bi axaftina xwe kir û da zanîn ku parêzerekî Kurd ji aliyê plîsên Tirk ve hatiye kuştin. 

Hemîd gotina 'PKK ne rêxistineke terorîst e' ya Tahîr Elçî bibîr xist û ragihand ku ji ber Elçî, aştî, azadî û demokrasî dixwest, ji aliyê dewleta Tirk ve hatiye qetilkirin.

Hemîd da xuyakirin ku wke Kurdên li Ermenîstanê ew kuştina Elçî weke ya Hran Dînk dibînin û bang li gelan kir ku li hemberî komkujiyên tên kirin, dengê xwe bilind bikin.

Hemîd sersaxî ji malbata Elçî û gelê Kurd re xwest û destnîşan kir ku Kurd wê têkoşîna Elçî bigihîne serî.