Li hemberî Serokkmarê Tirk Erdogan ê bi armanca destekkirina polîtîkayên şer û AKP’ê îro hat Strasbourg, bi hezaran kesan bi dirûşma, ‘Ti bi xêr nehatî Strasbourg RTE’ mîtîngeke mezin a protestoyî pêk anîn.

Li hemberî mîtînga hilbijartinê ya wê Erdogan li Strasbourg pêk bîne bi hezaran kesên li Fransa, Elmanya û Swîsre dijîn îro bi dirûşma, ‘Ti bi xêr nehatî Strasbourg RTE’ hatin gel hev.

Çalakiya bi hewldana Federasyona Yekîtiyên Elewiyan a Fransa (FÛAF) ve destpê kir, li gel gelek komeleyên Kurd, Elewî û çepgirên Tirkiyeyî  rêxistin û partiyên çep ên Fransî jî beşdar bûn.

Çalakiya bi armanca protestokirina Erdogan pêk hat, saet 12 :00’an  zêdetirî 2 hezar kesên di nav wan de Elewî, Kurd û sempatîzanên çepgirên Tirkiyeyî hebûn li Place Kleber kom bûn.

Di çalakiyê de bi rêzê Serokê Konfederasyona Yekîtiyên Elewiyan a Ewropa Huseyîn Mat, endamê Partiya Komunîst a Fransa û Parlamenterê berê yê PE Francîs Wurtz, Serokê FÛAF Erdal Kiliçkaya, endamê komunîstên ciwan Bas-Rhin Naîm Zayîr, Nûnerê Ewropa yê Partiya Demokratîk a Gelan Fayîk Yagizay, Hasret Batgî, Alî Atîk, Îbrahîm Balci (DIDF) û Hakan Gungor axivîn.

Di axaftinan de hat diyarkirin ku HDP’ê di hilbijartina 7’ê Hezîranê de ji sedî 13 ku deng wergirt dawî li desthilatdariya AKP’ê anî, Recep Tayyîp Erdogan (RTE)’yê wek ‘serok’ dernexist ji bo ‘rûyê xwe yê dijminê gelan nîşan bide’ wê were Strasbourg. Hat destnîşankirin ku Elewî, Kurd, çep, sosyalîst û demokrat tevayî beşan gotine ‘Ti bi xêr nehatî RTE’.

Di mîtînga mezin a protestoyî de piştî axaftinan li ber muzîkê ciwanan govend gerandin û çalakî heta saet 15.00’an dewam kir.

Hin partî û rêxistinên Fransî, Kurd, Tirk, Elewî û Çep ên banga tevlîbûna xwepêşandana bi dirûşma,  ‘Ti bi xêr nehatî Strasbourg RTE’ kirin ev in: PCF, NPA, MRAP, Komeleya Dostên Kurd, UEC, MJEC, Federasyona Yekîtiyên Elewiyan a Fransa (FUAF), Navenda Civaka Demokratîk a Kurd, ATÎK, DIDF, SKB, Avegkon, Nor Zartonk, Odak, AYF, Nazarpek, Hayardî.