Dî Natale ku di heman demê de Senatorê Vîctorîa ye got, "Partiya Kesk ji hewldana hikumeta Tirk a ku deriyekî nû li şerê navxweyî yê Sûriyeyê vedike, gelekî bi fikar e."

Lîderê Partiya Keskan diyar kir ku gelê Sûriyeyê ji xwe bi salan e di nava felaketekê de ye û got, "Çalakiyên Tirkiyeyê wê li herêmeke herî bi îstiqrar, herî ewle û herî demokratîk a Sûriyeyê rê li ber êşên mezin ên însanî veke û perspektîfa aştiyê bixe tehlûkeyê."

Dî Natale di dewama nameya xwe de wiha got, "Êrîş di demeke welê de hate kirin ku gelê Kurd ê li Sûriyeyê di şerê navxweyî yê Sûriyeyê de bi roleke jiyanî radibin. Alîkarî dan hewldanên ji bo têkbirina DAÎŞ'ê, Êzidî li Şengalê ji qirkirinê rizgar kirin û bi vî rengî bi roleke bi biryar rabûn.

Çalakiyên Tirkiyeyê hewldaneke vekirî ye ji bo sabotekirina gelê Kurd li Sûriyeyê û divê Awûstralya çavên xwe li vê yekê negire. Ez bang li we dikim ku hûn çalakiyên Tirkiyeyê şermezar bikin û ji bo peydakirina rêyekê ji bo kêmkirina aloziyê, bi civaka navneteweyî re bixebitin."

Tê payin ku Partiya Keskan li ser Efrînê pêşnûme pirsekê pêşkêşî hikumetê bike.