Parêzerên OHD û ÇHD'ê li Îzmîrê hatin binçavkirin
Parêzerên OHD û ÇHD ên xwestin li Îzmîrê daxuyaniyê bidin çapemeniyê, hatin binçavkirin. Navenda Giştî ya OHD'ê got, "Ti zext nikare pêşî li têkoşîna me bigire" û xwest, binçavkirî derhal bên berdan.
Navenda Giştî ya Komeleya Hiqûqnasên Azadîxwaz (OHD), li ser binçavkirina endamên xwe yên li Îzmîrê daxuyaniyeke nivîskî weşand.
Di daxuyaniyê de hat ragihandin ku 16 endamên OHD û ÇHD'ê hatine binçavkirin û hat gotin, "Zext wê nikaribe pêşî li têkoşîna me bigire. Yên ku dixwazin bi operasyonên binçavkirinê çavê endam û dostên me bitirsînin, divê zanibin ku têkoşîna me ya li dijî binpêkirina mafan û bêhiqûqiyê wê dewam bike. Hiqûqnasên Azadîxwaz heta niha bêteredût têkoşiya, wê ji niha û pê ve jî bi heman rengî têbikoşin. Zext, binçavkirin, girtin wê nikaribin pêşî li têkoşîna me ya hiqûqê ya azadîxwaziyê bigirin."
OHD'ê xwest parêzerên hatine binçavkirin derhal werin berdan.
