Çalakiya nobedê ya ji bo azadiya Rêberê Gelê Kurd Abdullah Ocalan li bajarê Strasboûrg ê Fransayê dest pê kir, ji 25'ê Hezîrana 2012'an û vir ve bê navber dewam dike. Nobed vê hefteyê ji aliyê 4 Kurdistaniyên ji bajarên cuda yên Swêdê hatin, tê girtin.

Zemzem Guneş, Hatîce Sert, Rizgar Heyder û Fîkret Ûçar roja Yekşemê nobed ji endamên Tevgera Jinên Kurd li Ewropayê (TJK-E) dewr girtin.

Endamên koma ji Swêdê, ji serê sibehê heta êvarê, agahiyê didin xebatkarên Konseya Ewropayê, Dadgeha Mafên Mirovan a Ewropayê (DMME), Komîteya Pêşîgirtina li Îşkenceyê (CPT), tûrîst û şêniyên bajêr.

Çalakger her wiha pirtûka Ocalan a bi navê 'Li Kurdistanê şer û aştî" û belavokên li ser têkoşîna jinên Kurd û pirsgirêka Kurd belav dikin.

BANG LI SAZIYÊN EWROPAYÊ HAT KIRIN

Li ser navê komê daxuyaniyek hat dayîn û bal hat kişandin ser girîngiya çalakiya nobedê ya ji bo azadiya Rêberê Gelê Kurd Abdullah Ocalan. Çalakgeran dan xuyakirin, ku Kurd wê ji azadiya Ocalan tawîzê nedin û banga lidarxistin çalakiyan kirin.

Di daxuyaniyê de bêdengiya dewletên Ewropayê li pêşberî faşîzma AKP'ê hat rexnekirin û hişyarî hat dayîn, ku Erdogan bi rêya komkujiyan hewl dide dîktatoriya xwe ava bike.

Di daxuyaniyê de ji Konkseya Ewropayê, CPT, DMME û saziyên din ê Ewropayê hat xwestin, ku li dijî tecrîda li ser Ocalan, komkujiyên li Kurdistanê tên kirin, desteserkirina şaredariyên li Kurdistanê bikevin nava liv û tevgerê.

Çalakgeran ji alîgirên demokrasî û azadiyê yên li Ewropayê jî xwestin, ku tevlî kampanya 'NA' ya li dijî dîktatoriyê bibin.

Koma nobedar a ji Swêdê wê heta roja Yekşemê nobedê bigire û piştre çalakî dewrî komeke din bike.