Li ser banga Navenda Çanda Kurd a Demokratîk li Malmo, Hevserokê PYD'ê Salih Muslim tevlî pîrozbahiyê bû. Muslim rewşa li Rojava û Bakurê Kurdistanê ji beşdaran re nirxand.

Muslim diyar kir, Newroz rojek têkoşîn û berxwedanê ye û destnîşan kir, ku ew bi ruhê Hawayê Hesinkar û Mazlûm Dogan her tim li ber zilmê radibin. Muslim got, "Di demeke kurt de em ê Reqayê ji çeteyên DAIŞ'ê paqij bikin û Rojava bikin xwedî statuyeke fermî."

Muslim di dewama axaftina xwe de rewşa li Bakurê Kurdistanê nirxand û işaret bi referandûma meha Nîsanê ya li ser destûra bingehîn a nû kir. Muslim got, Erdogan û dewleta Tirk operasyonên qirkirinê yên li dijî gelê Kurd didomînin û nûnerên hilbijartî yên gel digirin. Muslim destnîşan kir, gelê Kurd ku di Newrozê de hêz û rêxistinbûna xwe nîşanî dewleta Tirk da, wê di referandûmê de derbeke duyemîn li rejîma Erdogan û Tirk bixe.

Di pîrozbahiyê de Nûarîn, Diyar Dersîm, Kawa Ûrmiye û Farzîn derketin ser dikê û Kurdistaniyan li ber stranên wan govend gerandin.

Pîrozbahiya Newrozê bi qîrîna dirûşma "Bijî Serok Apo" qediya.