Ji bo hilbijartinên pêşwext ên 1'ê Mijdara 2015'an ên li Bakurê Kurdistanê û Tirkiyeyê, xebatên li Ewropayê dewam dikin. Li Wûppertalê, Komîsyona HDP'ê ya Hilbijartinê dest bi xebatên xwe kir.

Bi vê armancê li lokala Navenda Civaka Demokratîk a Kurd, di 30'ê Tebaxê de civînek hat lidarxistin. Di nirxandinên li civînê de hat ragihandin, ku divê kontola qeydan bê kirin û heta 10'ê Îlonê hilbijêrên ne qeydkirî bên qeydkirin.

'ŞERÊ AKP'Ê WÊ LI AKP'Ê VEGERE; EM Ê BI SER BIKEVIN'

Berdevkê Komîsyona Hilbijartinê ya HDP'ê ya Wûppertalê Lêhat Botî piştî civînê ji ANF'ê re axivî û got, "Dîktatorê li qesrê û ekîba wî, ku bi serketina HDP'ê ya di hilbijartinên berî 3 mehan re kursiya li binê wî jehiya, li Bakurê Kurdistanê şer ragihand û li bajarên Tirkiyeyê jî dest bi operasyonên qirkirina siyasî kir."

Botî anî ziman ku polîtîkayên şer ên AKP'ê yên jin, zarok, extiyar, ciwan her kesî qetil dike, wê li AKP'ê vegere û got, "Bi polîtîkaya xwe ya ji bo li bin bendê hiştina HDP'ê, ew ê di nava sergoyê dîrokê de winda bibin. Ev yek hewldanên dawî yên dîktatoriya qesrê ne." 

Botî da zanîn ku ew dixwazin ji hilbijartinên 7'ê Hezîranê bêhtir serketineke mezin bi dest bixin û bi vê bîr û baweriyê ew dixebitin. Botî got, "Ji îro û pê ve em ê hêza xwe zêdetir bikin û dest bi karê xwe bikin. Ez bawerim ku em ê di hilbijartinên pêşwext ên 1'ê Mijdarê de serketineke mezintir bi dest bixin. Em bang li tevahiya Kurdistanî û mirovên şoreşger demokrat ên li Ewropayê dijîn dikin, ku tevlî xebata me bibin."