Li bajarê Krasnadarê yê bi ser Federasyona Rûsyayê, cejna Newrozê bi coşeke mezin hate pîroz kirin. Pîrozbahî li Eywana Çandê ya Jeleznodorîjînîkê hate li dar xistin. Ji navçeyên derdorê, Kurdistanî û dostên wan ên ji Komara Xweser a Adigeyê beşdarî pîrozbahiyê bûn. Çalakiyê bi rêzgirtina ji bo Şehîdên Têkoşîna Azadiyê ya Kurdistanê dest pê kir, piştre jî sînevîzyona li ser Cejna Newrozê û berxwedana gelê Kurd hate nîşan dan.

Ji xeynî nûnerên Saziyên Kurdan, nûnerên otonomiyê yên gelên cihê û yên saziyan beşdar bûn. Li ser girîngî û wateya rojê siyasetmedarê Kurd Adil Cotkar, Serokê Otonomiya Çanda Kurd a Krasnadarê Îşxan Anqosî, Hevserokê Otonomiya Çanda Kurd ê Adigeyê Feyzo Husên û rêvebera Tevgera Jinan a Krasnadarê Dîlber Vekîl axivîn.

Cotkar di axaftina xwe de êrîşên PDK-AKP’ê yên li ser Şengalê şermezar kir û got “Gelê Kurd çawa ku di Newrozê de li hemberî zaliman têk neçû, hêz û îradeya wê heye ku li hemberî hemû zilm û pêkutiyan dikare li ber xwe bide.”

Cotkar di dûmahîka axaftina xwe de diyar kir, Erdogan ji bo ku xwe biparêze, pergala seroktiyê li ser gel ferz dike û got, “Gelê Kurd ligel pêkutî û Rewşa Awarte dadikeve qadan û xwedî li îradeya xwe derdikeve. Li her çar aliyên cîhanê Kurdan bi cejna Newrozê peyama Na’yê dan AKP û Erdogan. Li Tirkiyeyê aliyên cihê wê ji Kurdan hêzê bigirin û bibêjin Na, faşîzma AKP’ê jî bi berxwedana hevpar wê bi dawî bibe.”

Piştî axaftinan, Newroz bi stranên Serhat Çarnewa, Bêrîvan Arî û bi koma govendê ya zarokan dom kir. Bi muzîkê re gel govend gerandin.

Di eywanê de ji xeynî posterên Rêberê Gelê Kurd Abdullah Ocalan, posterê endamê damezirîner ê PKK’ê Mazlûm Dogan û alên PKK, KCK, PAJK’ê hatin daliqandin. Dem bi dem sloganên “Bijî Serok Apo” dihatin qîrîn.