Li dû panelên hilbijartinê yên li bajarê Lorîent û Nantesê, bi beşdariyeke xurt li Rennesê panelek bi heman mijarê hat lidarxistin.

Di panela li Navenda Civaka Demokratîk a Rennesê de, ku Parlamentera Stenbolê Huda Kaya amade bû, hat destnîşankirin ku HDP wê li rojavayê Fransayê bibe partiya yekemîn.

'BI DENGÊ XWE EM Ê BERSIVEKE MEZIN BIDIN'

Kaya anî ziman ku dengên ji Ewropayê, ji bo HDP'ê xwedî girîngiyeke mezin e û destnîşan kir, ku yekane partiya dikare rejîma AKP'ê ya dîktatoryal têk bibe, HDP ye. Kaya got, "Ji ber vê yekê li Cizîr, Gever, Farqîn, Gimgim, Sûr û gelek bajarên din, dest bi êrîşên hovane li dijî sivîlan kirin. Li hemberî van hemû êrîşen fîzîkî, polîtîkayên qirkirina çandî, em ê bi bikaranîna dengê xwe re besiva herî mezin di sindoqan de bidin AKP'ê."

Kaya ragihand, ku divê bersiva herî mezin ji aliyê jinan ve were dayîn û diyar kir ku hilweşîna rejîma AKP'ê wê darbeya herî mezin a li zîhniyeta serdestiyê be. Kaya ji jinan xwest ku bi coşeke mezin bixebitin.