Meclîsa Gel a bajarê Elmanya Lahr û Navenda Civaka Demokratîk a Kurd li bajarê Elmanya Leverkûsenê, kongreyên xwe lidar xistin.

LAHR

Meclîsa Gel a li bajarê Elmanya Lahrê, kongreya xwe ya 3. a asayî lidar xist. Kongre bi beşdariya sed delegeyan li Komeleya Çanda Kurd a Lahrê pêk hat.

Li dû deqeyeke rêzgirtinê, di kongreyê de rewşa siyasî hat nirxandin û piştre raporên ji aliyê rêveberiyê ve hatibûn amadekirin, hatin xwendin. Dûre hilbijartin hat kirin û di encamê de Hediey Aslan û Abdulkerîm Demîr ji bo Hevserokatiyê, 25 kes jî ji bo endametiya meclîsê hatin hilbijartin.

LEVERKÛSEN

Navenda Civaka Demokratîk a Kurd li Leverkûsenê jî 3. kongreya xwe ya asayî li salona Navenda Giştî ya FEDA'yê pêk anî.

Hevseroka Navendê Fatma Kisikyol piştî deqeyeke rêzgirtinê axaftina destpêkê kir, wêne nîşan da û got, "Îro salvegera şehadeta hevalê Kendal (Huseyîn Matûr) e. Di şexsê hevalê Kendal de ez hemû şehîdên Kurdistanê û şoreşa cîhanê bibîr tînim."

Nûnerê KCD-E jî di axaftina xwe ya li vir de Huseyîn Matûr bibîr anî û rojbûna Rêberê Gelê Kurd Abdullah Ocala pîroz kir.

Hevseroka Hewldana Mereşê Elîf Sonzamanci jî bal kişand ser şerê dewlet li Kurdistanê dimeşîne û diyar kir, ya tê xwestin li Pazarcixê bê kirin ji polîtîkaya xalîkirina Kurdistanê ji Kurdan cuda nîne.

Piştî axaftinan rapora salekê ya navendê hat xwendin, nirxandin û dûre hilbijartin hat kirin. Ji bo meclîsê, komîsyonên rêxistinî, civakî, edalet, têkiliyên derve, bawerî, çand, dîsîplîn, ciwan-spor û PYD'ê hatin hilbijartin.

Piştre ji bo hevserokatiyê hilbijartin hat kirin û di encamê de Fatma Kisikyol û Halîl Nas hatin hilbijartin.

Kongre bi sondxwarina hevserokan û endamên komîsyonan, bi dawî bû.