Çalakvanên ku ketibûn greva birçîbûnê, li pêşiya parlamenta Herêma Kurdistanê çalakiyek li dar xistin.

Li gorî nûçeya ajansa nûçeyan Rojnewsê, Çalakvanan daxwaznameyek ji 4 xalan pêşkêşî nûnerên parlamentê kirin û daxwaz kirin ku aliyên têkildar ên Herêma Kurdistanê di pratîkê de piştgiriya Kobanê û Rojavayê Kurdistanê bikin.

Daxuyaniya çapemeniyê li ser navê çalakvanan ji aliyê Mazin Yarsanî ve hat xwendin. Di daxuyaniyê de daxwaz hat kirin ku parlamenta Kurdistanê û fraksyonên di nava parlamentê de lez bidin ku di pratîkê de rola xwe ya di parastina Kantona Kobanê û rojavayê Kurdistanê de bilîzin.

Di daxuyaniyê de daxwaz ji parlamenta Herêma Kurdistanê hat kirin ku kiryarên Tirkiyê yên li hemberî xwepêşanderên kurd ên li bakûrê Kurdistanê şermezar bikin.

Çalakvanan 4 daxwaz pêşkêşî parlamenta Kurdistanê kirin û wiha ne;

1-Parlamento di nava 48 saetan de civîneke taybet li ser rewşa Kobanê li dar bixe û helwest werbigire.

2-Kantonên rojavayê Kurdistanê bi awayekî fermî werin naskirin. Ji ber ku niha 34 partiyên siyasî bi awayekî fermî wan nas dikin û herî kêm li parlamentê xwediyê 62 kursiyan in. Ev jî piranîne û em hêvîdar in piştgiriya xwe bixin pratîkê.

3-Bi awayekî fermî Deriyê Sêmalka were vekirin û hemû ambargoyên li ser Rojavayê Kurdistanê werin rakirin.

4-Biryar bê dayîn ku bi awayekî lezûbez piştgiriya leşkerî pêşkêşî Kobanê û rojavayê Kurdistanê bê kirin.

Parlamenterên fraksyona YNK, PDK, Tevgera Goran, Komela Îslamî ya Kurdistanê û Yekgirtûya Îslamî ya Kurdistanê soz dan ku daxwazên wan bigihîn Serokatiya Parlamentoyê û kar li ser bikin.