Rêxistina Kongreya Star a taxa Şêxmeqsûd a Helebê 3 roj berê bi armanca şermezarkirina tecrîda li ser Rêberê Gelê Kurd Abdulah Ocalan çalakiyên konvedanê bi dirûşmeya, "Jin, ji bo azadiya xwe û Rêber Apo serî hilde" dabûn destpêkirin. Çalakî îro di roja xwe ya sêyemîn de bi dawî bû.

Di çalakiya îro de şandeyên ji nunerên partiyên siyasî, saziyên sivîl, Hêzên Asayîşê û Mala Êzidiyan beşdar bibûn.

Bi navê şandeyên amade bibûn axaftin hatin kirin. Li ser girîngiya projeya Netewa Demokratîk a ku Rêberê Gelê Kurd Abdulah Ocalan pêşniyar kiriye û hate gotin ku ev proje yekitiya gelan û jiyana hevbeş pêk tîne.

Di axaftinan de hate gotin: "Bi îsrar û  berxwedana xwe em soz didin ku em ê Efrîn û Rêberê xwe azad bikin."

Paşê daxuyaniyek bi zimanê Kurdî û Erebî ji aliyê rêveberên Kongreya Star Nehla Mustefa û Fatima Hesen ve hate xwendin.

Di daxuyaniyê de hate gotin: "Weke Kongreya Star a Helebê bi dirûşmeya, ‘Jin, ji bo azadiya xwe û azadiya Rêber Apo serî hilde" çalakî dabûn destpêkirin"

Kongreya Star di daxuyaniyê de bang li hemû jinên cîhanê kir ku têkoşîna xwe ya azadiyê mezin bikin û dengê xwe bigihînin rêxistinên li dijî tundiyê da ku erka xwe ya li hemberî tecrîda li ser Ocalan û binpêkirinên dij mirovî yên li Efrînê pêk bînin.

Çalakî bi dirûşmeyên ji bo azadî bi dawî bû.