Ji bo destekkirina HDP'ê li semta Altona ya Hambûrgê buroya hilbijartinê hat vekirin. Di merasîma vekirina buroyê de hemû pêkhateyên HDP Hambûrgê, Civata Suryaniyan, nûnerên HAK-EVÎ, Mizgefta Şêx Seîd, saziyên demokratîk ên Kurdistanî û Tirkiyeyê û girseyeke qelebalix a gel amade bûn.

Di merasîmê de axaftina destpêkê ji aliyê Hevserokê Die Linke yê Altonayê Metîn Kaya ve hat kirin. Kaya diyar kir ku ew weke partî destekê didin HDP'ê û ji bo serketina wê dixebitin. Kaya destnîşan kir ku HDP di demokratîkbûyîna Tirkiyeyê de xwedî cihekî girîng e.

Hevseroka Koma Partiya Çep a li Parlamenta Eyaletê Cansû Ozdemîr jî di merasîma vekirina buroyê de peyivî û da zanîn ku girîng e HDP benda ji sedî 10'an derbas bike.

Ozdemîr ragihand ku yekane partiya cih dide temsîliyeta wekhev HDP ye û destnîşan kir ku yekane rêya pêşî li AKP'ê bigire, cihgirtina HDP'ê li parlamentê ye. Ozdemîr anî ziman ku ji ber baweriya xwe bi vê heye, ew ê desta ji wan bê bidin HDP'ê.

Paşê li ser navê pêkhateyên HDP'ê Yavûz Fersoglû axivî û got, "Em weke Kurd, Tirk, Ermenî, çerkez, Yahûdî, Ereb, Mihelmî, Laz, Suryanî, Rûm, Êzidî, Elewî, Misilman, Xiristiyan, rewşenbîr, hunermend û siyaetmedarên ji her qewm, bawerî û zayendî, nirxên HDP diparêze diparêzin û ji bo serketina HDP'ê çi ji destê me bê em ê bikin."

Fersoglû namzetên HDP'ê silav kir û bang li her kesên ku daxwaza destûreke bingehîn a demokratîk, azadîparêz û wekhev dixwazin kir, ku di hilbijartinên 7'ê Hezîranê de dengê xwe bidin HDP'ê.

Buroya agahdarkirinê ya HDP'ê ya li navnîşana Am Felde 2 / Altona, wê her roj saet di navbera 12 û 18'an de vekirî be. (Tel.: 040.25 49 55 47/- 41 35 85 20)

HDP Hambûrg her wiha wê di 26'ê Nîsanê de li semta Bergedorfê li DÎMA Sportcenterê bi beşdariya Hevşaredarê Bajarê Mezin ê Amedê Firat Anli û namzeta HDP'ê ya Îzmîrê Pinar Aydinlar şeva piştevaniya HDP'ê lidar bixe.