Li Berlînê ya ku paytexta Elmanyayê ye li ser ‘Berxwedana Îmraliyê’ panelek hate lidarxistin.

Çalakgerên greva birçîbûnê jî tevlî panelê bûn.

Berdevkê Meclîsa Neteweyî ya Efrîkayê Soloman Lecesa Tsenolî, parlementera HDP’ê û parêzera Ocalan Ebrû Gunay û Nûnera Tevgera Jinên Kurd a Ewrûpayê Fîdan Yildirim tevlî panelê bûn.

Berdevkê Meclîsa Neteweyî ya Efrîkayê Soloman Lecesa Tsenolî got ku, “Azadiya Ocalan ji bo Kurdistan û Rojhilata Navîn girîng e. Heta ku gelê Kurd azad nebe, wateya azadiya me jî tune.”

Tseneolî got ku, “Heta ku gelê Kurd û Ocalan azad nebin, ew ê wateya azadiya kesên demokrat û pêşverû jî tunebe. Dema ku me bi rejîma Aparteîd re xwest muzakereyê bike, Mandela ev tişt red kir û got ku ‘Kesekî dîl nikare ji bo aştiyê hevdîtinê bike; divê hevalên min jî tevlî vê pêvajoyê bibin.’ Li Tirkiyeyê jî xwestin ku Ocalan, gel û tevgerê ji hev dûr bixînin. Lê bi berxwedaneke xurt a civakî ev tişt dikare were pûçkirin.

GUNAY: OCALAN AZADIYA JINÊ DIPARÊZE

Parlementera HDP’ê Ebru Gunay jî bi silavkirina çalakgerên greva birçîbûnê dest bi axaftina xwe kir û got ku, “Li ber me rêberek heye ku felsefeya xwe li ser azadiya jinê ava kiriye û li hemberî wî jî pergaleke tecawizê heye. Li Rojhilata Navîn DAÎŞ êrîşî jinên Êzidî dike. Ev êrîşek e li ser felsefeya rêzdar Ocalan. Mandela demekê dirêj li giravê ma lê dikaribû hevalên xwe bibîne. Di warê hevdîtinan de Mandela, parêzerên wî diçûn ba wî. Lê Ocalan ji sala 2011’an û vir ve nikare parêzerên xwe re bicive.

YILDIRIM: OCALAN DI HEDEFA EMPERYALÎZMÊ DE YE

Fîdan Yildirim jî di panelê de got ku, “Çima gelo evqasî êrîşî Ocalan dikin? Ji ber ku Ocalan berê me kişand ser 5 hezar salan berê. Ocalan got ku, ‘Jinan 5 hezar sal berê pêşengî ji civak û mirovayetiyê re kirin û di wê serdemê de herî zêde îcat hatine kirin. Ji ber vê jî heta ku li hemberî pergala serweriya mêran têkoşîn neyê kirin, jin neyên azadkirin ew ê tu kêşe neyên çareserkirin.”