Dewleta Îranê di sê mehên destpêkê yên sala 2025’an de li Rojhilatê Kurdistanê û seranserî Îranê 230 kes darve kirin. Li gorî daneyên Rêxistina Mafên Mirovan a Îranê, di nava kesên hatine darvekirin de 8 jin jî hene.
Rêveberê Rêxistina Mafê Mirovan a Îranê Mehmûd Emîrî Muqedem ku navenda wê li Norweçê ye, li ser bîlançoya darvekirinê li Rojhilatê Kurdistan û Îranê raporek belav kir.
Di raporê de hate diyarkirin ku di nava sê mehên destpêkê yên îsal de li Rojhilatê Kurdistan û Îranê, 8 jê jin, 230 kes hatine darvekirin.
Mehmûd Emîrî destnîşan kir ku hejmara darvekirinên van sê mehên borî li gorî heman mehên sala borî du qat zêdebûye û got: “Îran ji bo darvekirina girtiyên siyasî sûd ji aloziyên di navbera welat û Emerîkayê de werdigire.”
Hêjayî gotinê ye ku sala borî 975 kes li Rojhilatê Kurdistan û Îranê, ji aliyê rejîma Îranê ve hatibûn darvekirin.
