Komploya navneteweyî ya 15'ê Sibatê, ku li dijî Rêberê Gelê Kurd Abdullah Ocalan hat kirin, di salvegera 18. de li gelek bajarên Ewropayê hat şermezarkirin.

HEÎLBRONN: Bi armanca şermezarkirina komploya navneteweyî, li bajarê Heîlbronn ê Elmanyayê standa agahdarkirnê hat vekirin û piştre mîtîng hat lidarxistin. Bi sedan kes tevlî mîtîngê bûn. Li ser navê Navenda Civaka Demokratîk a Kurd li Heîlbronnê Saît Ozturk li vir axivî û got, "Hêzên komploker, berî ku Kurdên ji aliyê Rêber Apo ve hatine afirandin nas bikin, ketine nava şaşitiyeke mezin. Tevî dîlgirtina 18 salan a Rêber Apo jî, Kurd bi îdeolojiya wî roj bi roj xurtir dibin." Di dema mîtîngê de faşîstên Tirk hewl dan provokasyonê bikin, lê çalakgeran destûr nedan.

MANTES-LA-JOLÎE: Li bajarê Mantes-la-Jolîe yê Fransayê, bi beşdariya ciwanên ji herêma Normandiyayê, çalakiyeke protestoyî hat lidarxistin. Kurdistaniyên li ber Gara Trenê li hev civiyan, ber bi Qesra Edaletê ve meşiyan û dirûşmên "Azadî ji Ocalan re", "Bimire rejîma faşîst a Tirkiyeyê", "Em hemû Ocalan in" û "Çareseriya aştiyane ji bo Kurdistanê" qîriyan. Fransiyên li herêmê jî bi çepikan piştgirî dan Kurdistaniyan.

STÛTTGART: Li bajarê Stûttgart ê Elmanyayê mîtîngek hat lidarxistin. Mîtîng li meydana Schlossplatzê pêk hat û gelek welatparêzên Kurdistanî û dostên wan lê amade bûn. Di mîtîngê de belavoka NAV-DEM'ê hat xwendin û bi sedan ji vê belavokê hatin belavkirin. Di mîtîngê de hat xwestin, Ocalan û hemû girtiyên siyasî azad bibin û ji bo vê jî banga piştgiriya navneteweyî hat kirin.

BASEL: Komploya navneteweyî ya 15'ê Sibatê, li bajarê Basel ê Swîsreyê hat şermezarkirin. Di çalakiya girseyî de, gelek belavokên bi zimanê Elmanî hatin belavkirin û hat ragihand, Ocalan pêşî li pêkhatina armancên komployê girtiye. Qisekeran bal kişand ser mezinbûna Tevgera Azadiyê ya Kurd û gotin, hêza gireya rêxistinbûyî hê dînamîk e. Qisekeran xemsariya saziyên navneteweyî ya li pêşberî tecrîdê rexne kirin.

ÛPPSALA: Li bajarê Ûppsala yê Swêdê, bi sedan kes saet di 17:00 de li taxa Slottbackeyê li hev civiyan û ber bi navenda bajêr ve bi qîrîna dirûşmên "Bê Serok jiyan nabe", "Bijî Serok Apo", "Destên xwe yên bi xwîn ji Ocalan vekişînin", "Komploker Erdogan" û "Artêşa Tirk ji Kurdistanê derkeve" meşiyan. Çalakger piştre li meydana Storayê li hev civiyan û daxwaza azadiya Ocalan kirin.

FRÎBOÛRG: Ji bo şermezarkirina komploya navneteweyî, li bajarê Frîboûrg ê Swîsreyê, bi sedan Kurdistanî û dostên wan bi meşaleyan meşiyan. Meşa bi meşaleyan li meydana Place Georges-Pythonê veguherî mîtîngê. Li dû deqeyeke rêzgirtinê axaftin hat kirin û bal hat kişandin ser tecrîda giran. Çalakgeran xwestin Ocalan azad bibe. Çalakî bi xwendina belavokê qediya.