"Komîsyona Şopandinê" ya navçeya Colemêrg Şemzînanê, ji bo vekişîna gerîlayên HPG'ê bişopînin, da ku bûyerek neyînî neqewime, li 6 herêmên cûda belav bûn.

Li ser banga Rêberê Gelê Kurd Abdullah Ocalan a ji bo vekişîna gerîlayên HPG'ê ya ji Bakurê Kurdistanê û Tirkiyê û piştî daxuyaniya Serokatiya Konseya Rêveber a Koma Civakên Kurdistanê KCK'ê, hêzên gerîla îro dest bi vekişînê kirin.

Nûnerên BDP û rêxistinên civakî yên sivîl ên li navçeya Colemêrg Şemzînanê ne, 6 komîsyonên cûda yên şopandinê avakirin.

Ev "Komîsyonên Şopandinê" yek bi yek çûn herêmên Rûbarok, Zerdan, Botan, Şehîdan, Sêkoşeya Şeytan û Çarçela. 

"Komîsyonên Şopandinê", wê li vê derê liv û tevgera leşkerî ya di dema vekişîna hêzên gerîla de bişopînin.

Ji aliyekî din ve, hat ragihandin ku ji îro danê sibê û vir ve li herêmên Bêgaltê û Xapûşkê yên ser bi bajarokê Rûbarokê operasyona leşkerî destpê kiriye.

Hat hînbûn ku veguhestina leşkerî ya ber bi herêma operasyonê jî dewam dike.