Rêxistinên hempîşeyî yên çapemeniyê, ji bo rûniştina biryarê ya Hevseroka DFG’ê Dîcle Mûftûoglu ku wê di 24’ê Cotmehê de li Dadgeha Cezayê Giran a 5’emîn ya Amedê bê dîtin, banga tevlîbûn kirin.
Banga tevlîbûnê ji aliyê Komeleya Rojnamevanên Dicle û Firatê (DFG), Komeleya Lêkolînên Hiqûqî û Medya (MLSA), DÎSK Basin-Îş, Nûnertiya Sendîkaya Rojnamevanên Tirkiyeyê (TGS) ya Amedê û Komeleya Rojnamevanên Jin ên Mezopotamyayê (MKG) ve hate kirin.
Di daxuyaniyê de hat gotin ku Hevseroka Giştî ya DFG’ê û edîtora Ajansa Mezopotamyayê (MA) Dîcle Mûftûoglû ji ber xebatên xwe yên rojnamevaniyê bi îdîaya “endamtiya rêxistinê” û “rêxistin avakirin û birêve birin” tê darizandin.
Di daxuyaniyê de hat destnîşankirin ku Dîcle Mûftûoglû û parêzerên wê wê di rûniştina 24'ê Cotmehê de parastina xwe ya dawî bikin û tê payîn ku di vê rûniştinê de biryar bê dayîn.
Rêxistinên pîşeyî yên çapemeniyê, bal kişandin ser zextên li dijî rojnamevanên Kurd ên li Tirkiyeyê zêde dibin û diyar kirin ku darizandina Dîcle Mûftûoglû ji ber xebatên wê yên pîşeyî, tê wateya gefa li hemberî azadiya çapemeniyê û nirxên bingehîn ên demokrasiyê ye û ev tişt hat gotin, “Ji bo parastina mafên Dîcle Mûftûoglû û hemû rojnamevanan em banga hevgirtinê dikin. Rojnamevanî parçeyeke bingehîn a demokrasiyê ye û parastina rojnamevanan tê wateya parastina azadiya ramanê.”
