Mehmet Alî Koçak ku 20'ê Sibatê li Cenevreyê li dijî tecrîdkirina Rêberê Gelê Kurd Abdullah Ocalan dest bi greva birçîbûnê ya bêdem-bêdorveger kir, 37 roj in di greva birçîbûnê de ye.

Koçak çalakiya xwe li Navenda Civaka Demokratîk a Kurd a Cenevreyê didomîne. Berdevka PYD'ê ya Ewropayê Zozan Dêrik û Nûnerê PYD'ê yê Swîsreyê Abbas Omar di roja 36'an de serdana Koçak kirin.

Koçak di dema serdanê de serketina YPG, YPJ û QSD'ê ya li dijî DAÎŞ'ê pîroz kir û diyar kir, ji bo bidawîbûna tecrîdkirina Ocalan divê şoreşa Rojava bê mezinkirin.

OMAR: DIVÊ HER KES BI BERPIRSYARÎ NÊZÎ PÊVAJOYÊ BIBE

Nûnerê PYD'ê yê Swîsreyê Abbas Omar jî da xuyakirin, ji bo bidawîbûna tecrîdkirina Ocalan ew piştgiriyê didin berxwedêrên greva birçîbûnê û got, "Wezîfeya me her kesî ye ku xwedî li vê çalakiyê derkevin û mezin bikin." Omar destnîşan kir, ji bo hilweşandina faşîzmê û bidawîbûna tecrîdê divê her kes bi berpirsyarî nêzî pêvajoyê bibe û berxwedanê geştir bike. Omar got, "Em pê piştrast in ku em ê bi ser bikevin, Rêberê xwe azad bikin."