Berdevka Komîsyona Hiqûq û Mafê Mirovan û Endama Desteya Rêvebir a Navendî ya HDP’ê Ayşe Acar Başaran derbarê berxwedana Leyla Guven daxuyaniyeke nivîskî weşand.

Di daxuyaniyê de ev tişt hate diyarkirin:

“Parlementera me ya Colemêrgê Leyla Guven ji 8’ê Mijdarê ve di greva birçîbûnê ya bêdawî û bêdorveger de ye. Tendirustiya Guven hatiye asta krîtîk. Leyla Guven 64 roj in di greva birçîbûnê de ye û di hefteya dawîn de nikare derkeve hevdîtina parêzerên xwe. Rajena Guven 55-60 û tansiyona wê jî 5-7 e.

Ji ber greva birçîbûnê Leyla Guven êdî nikare avê jî vexwe. Ligel ku qawîşa Guven nêzî cihê hevdîtina bi parêzeran re ye, Guven nikare derkeve hevdîtinê.

Leyla Guven nêzî 15 kîloyan li xwe kêm kiriye û tena serê xwe nikare pêdiviyên xwe bi cih bîne. Tena serê xwe nikare bimeşe, li hemberî deng û ronahiyê hesasiyeta wê çêbûye.

Di heman deme de ji bo rakirina tecrîda li Îmraliyê di 27’ê Mijdarê de li girtîgehan grevên birçîbûnê hatibûn destpêkirin û çalakî belav dibe. Heta îro herî kêm 171 girtiyan dest bi greva birçîbûnê ya bêdawî û bêdorveger kirine.

Desthilatdariya heyî hay ji rewşa Guven û ya ji girtîgehan heye lê heta niha tu gav neavêtine. Heke rewşeke neyînî pêk were hikumeta AKP’ê berpirsyar e.

Em bang li raya giştî, saziyên navneteweyî, saziyên hiqûq û mafê mirovan û saziyên civakî dikin ku bila têkevin nav hewldanan û nerazîbûna xwe ya demokratîk nîşan bidin.”