Kurdistanî û antî faşîst, ji bo bîranîna Dener li Hambûrgê li hev civiyan. Di merasîma bîranînê de daxwazên ji bo azadiya Ocalan û statuya Kurdistanê careke din hatin bilêvkirin.

Mîtîng li ber avahiya Rote Flora pêk hat û wêneyekî mezin ê Halîm Dener ku dema hat qetilkirin 16 salî bû, bi dîwêr ve hat zeliqandin.

Qisekeran dan xuyakirin, ku di çîroka jiyana kurt a Dener de pirsgirêkên Kurdan ê hê nehatine çareserkirin hene û xwestin, komkujiyên li Kurdistanê bên qedandin, qedexeya li ser PKK'ê ya li Elmanyayê were rakirin.

Kurdistaniyên li Hambûrgê ku bênavber çalakiyan lidar dixin, roja Şemiyê saet di 15:00 de wê bi dirûşma "Ji Ocalan re azadî, ji Kurdistanê re statu" ji Hachmannplatzê ber bi girtîgeha Holstenglacîs ve bimeşin. Li vê girtîgehê du siyasetmedarên Kurd Bedrettîn Kavak û Hasan Dûtar tên ragirtin. Rûniştina dadgehkirina Kavak ê par meha Tebaxê li Bonnê hatibû girtin, wê hefteya pêş roja Pêncşemê dewam bike. Endamê Federasyona Komeleyên Êzidiyan (FKÊ) Dûtar jî di 8'ê Hezîranê de li Kopenhagenê hatibû binçavkirin û berî du rojan radestî Elmanyayê hatibû kirin.