18 girtiyên siyasî yên li Girtîgeha Şakranê ya Alîaga ya Îzmîrê, ji bo rakirina tecrîda li ser Rêberê Gelê Kurd Abdullah Ocalan, bidawîkirina binpêkirinên mafên mirovan li girtîgehan û rabûna li ber îşkenceya fîzîkî û psîkolojîk, ji 15'ê Sibatê û vir ve bi rengekî bêdem-bêdorveger di greva birçîbûnê de ne.

8 girtî j beşa T2, 5 girtiyên jin ji beşa T4 û 5 girtî ji beşa jinan tevlî çalakiyê bûne.

Li girtîgeha ku greva birçîbûnê lê dewam dike û veguheriye navenda îşkenceyê, her roj agahiyek li ser binpêkirina mafên mirovan tê. Ji ber ku cezayê axaftina bi telefonê û hevdîtinê li girtiyan hatiye qedexekirin, agahiyeke zelal ji nava girtîgehê nayê bidestxistin.

Malbatên girtiyan bi tirs û fikar in. Malbatên çûn serdanê, li pêşiya girtîgehê sixêf li wan hat kirin û ji ber ku nerazîbûn nîşanî zext û zordariyê dan, ceza li wan hat birîn ku mehekê nikarin tevlî hevdîtinan bibin.