Dayîkên Şemiyê di çalakiya xwe ya vê hefteyê de 3 jinên siyasetmedar ên Kurd bibîr anîn û qetilkirina wan şermezar kir.

Dayîkên Şemiyê, li kolana Orhan Dogan li ber dibistana Amadeyî Cizîrê kom bûn û çalakiya xwe ya heftane berdewam kirin. Dayîkan dîsa wêneyên windayan ên di salên 1990\'an de ji aliyê polîs, tîmên taybet, leşker, cerdevan û endamên JÎTEM\'ê ve hatin windakirin bilind kirin. Gelek malbatên windayan û rêveberên MEYA-DER û KURDÎ-DER tevlî çalakiyê bûn. Li ser navê Dayîkên Şemiyê Ayşe Dayan, axaftin kir û qetilkirina 3 jinên Kurd sazûmankara PKK\'ê Sakine Cansiz, Nûnera KNK\'ê ya Parîsê Fîdan Dogan, Endama Tevgera Ciwanan Leyla Şaylemez ku di 9\'ê Çileyê de li Parîsê hatin kuştin şermezar kir. Dayan diyar kir ku, heta qetilkirin ronî bibe dê têkoşîna xwe berdewam bikin û wiha got: \"Em tu carî şehîdê xwe ji bîr nakin. Em dê heta dawî di rêça wan de bimeşin.\"

Çalakî bi rûniştina 5 deqîqeyan bi dawî bû.