Kurdistaniyên ku li dijî tecrîdkirina Rêberê Gelê Kurd Abdullah Ocalan doh li paytexta Swêd Stockholmê dest bi greva birçîbûnê kirin, li ber avahiya Wezareta Karên Derve ya Swêdê çalakiyek pek anîn.
Çalakgeran pankarta bi nivîsa "Piştgiriyê bidin çalakgerên greva birçîbûnê, dawî li tecrîdê bînin û CPT bikeve nava liv û tevgerê" tevî dowîzên ji amblema HDP'ê hildan û daxwaza hevdîtinê li rayedarên Wezareta Karên Derve kirin.
Bi navê Wezareta Karên Derve du rayedaran pêşwazî li çalakgeran kirin û anîn ziman ku ew ji rewşa li Tirkiyeyê bi fikar in û rewşa çalakgerên greva birçîbûnê ji nêz ve dişopînin.
Endama Desteya Rêveberiya Meclîsa Jinên Kurd a Amara Nujeen Ahmed bi navê çalakgeran bi rayedarên Wezareta Karên Derve re axivî û li ser tecrîdkirina Rêberê Gelê Kurd Ocalan agahî da.
Ahmed bi bîr xist, Leyla Guven a ku ji 7'ê Mijdarê ve di greva birçîbûnê de ye, tevî çalakgerên din ên greva birçîbûnê ji bo jiyanê li ber xwe didin û ji Swêdê xwest, ji bo bidawîbûna tecrîdê bikevin nava hewldanan û mijarê bixe rojeva Yekîtiya Ewropayê.
Ji çalakgeran Latîfe Fegan û Gaffûr Mûhammedî piştre ji ANF'ê re axivîn û diyar kirin ku ji bo bidawîbûna tecrîdkirina Ocalan wê heta dawiyê têbikoşin û li Swêdê hevdîtinên xwe yên li ser mijarê bidomînin.
