Kurdistanî li dijî karesata lehiyê ya ku gelek herêmên Rojhilatê Kurdistanê û Îranê serûbin kiriye, seferber bûn.

Piştgiriya ji bo kampanyayên alîkariya madî ku ji aliyê Heyva Sor a Kurdistanê ve hatine destpêkirin, zêde dibe.

'EM TEVLÎ KAMPANYAYÊ BIBIN'

Şiyar Xelîl, Cemal Kobanê, Mele Mûstafa Tûzak û Omer Bagdûr tevlî kampanya alîkariyê ya Heyva Sor bûn. Çalakgeran bang li Kurdistaniyan û her kesî kirin ku tevlî kampanyayê bibin.

Welatparêzên Kurd Gulê Varto û Nilo Dersim jî tevlî kampanyayê bûn.

Çalakgerên greva birçîbûnê li komeleya NAV-DEM a Berlînê bi rayedarên Heyva Sor û welatparêzan re civiyan.

Berxwedêran 300 Euroyên ku kom kiribûn dan rayedarê Heyva Sor Kadîr Serhat û bang li welatparêzan kirin ku tevlî kampanyayê bibin.

Berxwedêran diyar kirin, ev yek di heman demê de li paytext Berlînê destpêkirina kampanya alîkariyê ye û gotin, alîkariya wan a ji 50 heta 100 Euroyî sembolîk in û ew li bendê ne ku ev yek ji bo gelê li Berlînê bibe destpêkek.