Parlamenterê Rihayê yê HDP'yî Osman Baydemîr, duh êvarê li Îzmîrê dema diçû mêvanxaneya SGK'ê ji aliyê polîsan ve hatibû binçavkirin û ji ber ku Edliyeya Şirnexê girtîbû, ji bo dayina îfadeyê heta ber destê sibehê li mêvanxaneyê hatibû sekinandin.

Danê sibehê Baydemîr birin Edliyeya Îzmîrê û bi rêya sîstema deng û dîmen (SEGBÎS) Edliyeya Şirnexê îfadeya Baydemîr girt. Piştî girtina îfadeyê Baydemîr hat berdan.

Baydemîr xwestibû destwerdana 27'ê Kanûna 2015'an a li cenazeyên li navçeya Cizîr a Şirnexê şermezar bike û ji ber vê yekê bi îdîaya "li ber qanûna civîn, meş û xwepêşandanê rabûye" doz lê hatibû vekirin. Ji ber vê dozê îfadeya Baydemîr hate girtin.